Adaab dostoo 
Ap sab ko meri taraf se Eid ki dheroon khushiya mubarak aur umeed karti hon ke ap sab ki eid achi guzre hogi.
Eid ki munasibat se ap sab ki nazar ‘Tohfa-e-Eid’ lekar hazir huwi hon. Fakhira Batool ki yeh nazm ap sab ko yakenan pasand aegi
aur hosakta hai Eid ke din meri tarah ap mein se kisi ki bhi yeh sada-e-dil ho. Aara say zuroor mustafeez kijiey ga muntazir rahongi.
**
hai wahi aasmaN, zameeN wahi
maah-o-anjam issi tarah roshan
kehkeshaaN abb bhi muskurati hai
phool kaliyaN mehek rahi hein yoonhi
baad muddat ke saaray pardesi
apne apne gharoN ko aaye hein
her taraf rang-o-boo ka mela hai
aur tanhaa mein apne kamray mein
kub se bhaiti hoon aur sochti hoon
jaanay kya baat hai keh ghar mein mere
jo guzashta baras thi ronaq, abb
woh kaheen bhi nazar nahin aati
hai fiza mein ajeeb sannata
haaN faqat eik tere jaanay se
aisa mehsoos ho raha hai mujhe
rut khushi ki her taraf to aai
sirf chote se mere aangan mein
eid abb ke baras nahiN aai**
