chal diye manzil ke jaanib, paasbaaN koi nahiN hai
raahat-e-charagari ko, aasmaaN koi nahiN hai
yuN akele dekh kar bhi, na kaho tanha mujhe tum
saath mere hai khuda bas, kaarvaaN koi nahiN hai
gir gaye sajde meiN jis dam, bhool kar hasti ye faani
bas usi ke ru-ba-ru haiN, darmiyaN koi nahiN hai
kar to leN ham is zameeN par, apne haq ka laakh dawa
la_makaaN haiN bas yahaaN par, aashiyaN koi nahiN hai
the jo samjhe naam unka, ta_qayamat tak rahega
aaj unke bood ka naam-o-nishaaN koi nahiN hai
sunte aaye haiN barhe hai, dil milaane se mohabbat
haath phailaye khare hain, mezbaaN koi nahiN hai
dil ke tukre ho gaye par, ham rahe Khamosh yuN hi
aaj ki dunya meiN itna, bezubaaN koi nahiN hai
haal apne dil ka kis ko, ja sunaayeN aaj ya rab
dost yuN to Khoob apne, raazdaaN koi nahiN hai
kah chuke sab haal dil ke, ab Anis aaram se hain
aur apne paas yaaroN, daastaaN koi nahiN hai
~~~~*
“If you belong to Allah, rest assured that Allah will indeed belong to you”
“Dream as if u live forever live as if u will die today”
“The best way to cheer yourself up is to try to cheer somebody else up.”
~~~~*