Khaar-e-dil raqs mein hai
Chashm-e-tanha pe kai aks dar-o-baam leye
Dast-e-tanha pe bikharti huwi shaam leye
Khaar-e-dil raqs mein hai
Khaar-e-dil raqs mein hai yun ke issay umer huwi
Wakt ki taal pe raqs karte huwe
Raat ka pichla pehar
Jaani pehchaani hawaa
Ajnabi ho ke bhi apni rahi aisi sada
Khul gaee umr-e-guzashta ki kitaab
Daf-attan wasl ka baab
Daf-attan hijr ka baab
Ek parchaee larazti hai pas-e-parda khwaab
Khaar-e-dil raqs mein hai
Kis ne roka thaa mujhe raah mein chalte chalte
Kaun thaa jisko mein ne pukaara thaa bahut
Pyar mein jeeta gaya ishq mein haara thaa bahut
Bhujh chuke saare deyey
Ab na woh raahguzar hai na khabar
Haan bas ek gard-e-safar
Khaar-e-dil raqs mein hai
Jis ko ek umer theharna thaa woh pal thehra
Jaate jaate bhi kaee nishtar jaan chorh gaya
Din ke hamraah mere saath chali aati thee
Shab ke bistar ki dukhan
Ajnabi lagne lagi apni hi khushbo-e-badan
Dil tu pehle hi kisi Ishq mein be-haal sa thaa
Aur ab chashm bhi do-neem huwi
Ek mere haal ki tasweer se tasweer huwi
Ek kisi khwaab fusoon khaiz se zanjeer huwi
Apne seene mein sambhale kisi khursheed ki aag
Apne daaman pe sambhale kisi gulzaar ki khaak
Apni aankhon pe sajaye kisi mehtaab ki raakh
Khaar-e-dil raqs mein hai
Khaar-e-dil raqs mein hai yun ke issay umer huwi
Wakt ki taal pe dhun karte huwe…
very nice :k:
beautiful:k: