Re: dekhooN tu meri DuaoN mein asar hai ke nahi hai!
**salaam
chuN k is Ghazal ko aapne "intiKhaab" meN chaspaaN kiyaa hai is liye mujhe yeh ilm to nahiiN k kis kaa kalaam hai. agar yeh aapkaa hai to ise phir sho'raa-e-Gapshap meN honaa chaahiye. Khair...
is Ghazal meN bahr/vazan/qawaafii ke mows paaye jaate haiN jisse gumaan hotaa hai k yeh kisi ustaad shaa'ir kaa kalaam nahiiN hai [lihaza ise "intiKhaab" meNnahiIN honaa chaahiye]. maiN yeh baat sirf is liye kah rahaa huN k maiN sirf rasmii waah waah kaa qaa'il nahiiN huN aur jo bhii aataa ahi use bataa detaa huN taa k ham meN se jinko yeh baat ma'loom nahiiN ma'loom ho jaaye aur is taraH unke kalaam meN chaar chaand lageN.
is Ghazal ko paRh kar ek bahooot baRaa noqs saamne aayaa jo kam o besh har urdu bolne waalaa yeh Ghalatii kartaa hai isii liye yeh Ghalat-ul-'aam se ab Ghalat-ul-'awaam ban gayaa hai. shaa'irii meN saHeeH talaffuz kii adaayegii vazan kii roo se bahooot zaroorii hai. kuchh alfaaz aise haiN jo har shaKhs Ghalat boltaa hai sivaaye chande ma'doode...masalan:
alfaaz jaise Shahar, sabar, qahar, zehar, mahar log Ghalat bolte haiN aur Ghalat likhte haiN. asl talaffuz hai shahr, sabr, qahr, zahr, mahr hai ya'nii aakHirii Harf [re] se pahle lafz par ZABAR nai hai. shaa'irii meN Ghalatii bahr/vazan kii siii liye hotii hai k shahar aur shahr kaa vazan alag alag hai...ya'nii...shahr = 1 rukn [syllable] hai jab k shahar [sha+har] = 2 arkaan [rukn ka plural] haiN.
