Kahin padha tha…
Muhabbat ka darya khushk hota nahin barishon ke rooth jaane se
Khatm hoti nahin chahaten kisi ke door chale jaane se
Kahin suna tha…
Muhabbaton main khone aur paane ka bayan nahin hota
Jo bhi mil jae sood hai, kho jae kuch to zayan nahin hota
Padhte rahe sunte rahe muhabbat ki hikayaten bohut
Puri hotin dekhi rasmen aur tootin rivayaten bohut
Dekhe kai roop muhabbat ke kai roop jaane hain
kai raaz hue ayan bohut abhi anjaane hain
Kiyun koi saath reh kar bhi dil ke paas nahin hota?
Kiyun kabhi bohut kho kar bhi khone ka ihsaas nahin hota?
Kiyun muhabbat main shiddat se aage badhne wale dabe paon palat jaate hai?
kiyun jeeti hui baazi ke muhre yak ba yak ulat jaate hain?
Manaa muhabbat main kisi cheez ki haajat nahin hoti
Ek baar badh kar phir palatne ki riwayat nahin hoti
Ankahi aa kar darmayan thehr jae to muhabbat adhoori hai
lafzon ki barish na sahi, izhaar ki phuwaar zaroori hai
Band darwazon per dastak dene wale aakhir thak jaate hain
yehi waja hai shiddaton se aage badhne wale ek din palat jaate hain
