Raastey key donoun taraf
lambey oonchey ghaney darakht
apni parchaayein sey raastey key
beechoun beech chataayi bichaatey huey dikhaai dein
darakhtoun kou naa jaaney kaisey
khabar mil gayi key hum
kari dhoop mein nikley hein
so, be-chaaroun ney hamarey
sastaaney kaa intizaam kar diya
ab hum unn sey kaisey kehtey
hamein chaltey rehnaa ho gaa
abhi rukney ki koi gunjaaish nahin!
lakin hum
logoun ki be-gaangi kou buraa kyun kahein
paeroun ki mehmaan nawaazi ki
kyun naa taareef karein?
