Munawar Jameel apni kitaab Dekho Yeh Zakhm Mere mein bilkul baja farmaatay hain …
Kuch ka kuch hone mein dair kitni lagti hai, bani huwi baat ke bigarne mein, dosti ko dushmani mein badalne mein ya sadeyoon ki musafat tay kar ke qayyam hone walay taluqq ko pal bhar mein tootne mein … dair kitni lagti hai …
Bikharne ka ammal mehaz ek lamhay ka mohtaj hota hai jab ke simatne ke ammal ke leye be-shumar lamhaat darkaar hotay hain… Dil ke tootne mein bhala dair kitni lagti hai … Bikhri cheezain ekhatta karna kitna takleef deh amal hai, bikhri cheezain agar ekhatti ho bhi jayain tu simat’teen nahee aur agar simatt jayain tu jurteen nahee …
Khwaab o khat ke jalnay mein dair kitni lagti hai
Raakh ke bikharne mein dair kitni lagti hai
Hum tu khwaab walay thay neend mein rahay barsoo
Warna aankh khulnay mein dair kitni lagti hai
Hijr ke tamazat se wasl ke alaoo tak
Larkeyoon ke jalnay mein dair kitni lagti hai
Baat jaisi be-maeni baat aur kya hogi
Baat se mukarnay mein dair kitni lagti hai
Ze’amm kitna kartay ho ek chirag per apnay
Aur hawa ke chalnay mein dair kitni lagti hai
Jab yaqeen ki baahoon per shak ke paoon par jayain
Chooreyaan bikharnay mein dair kitni lagti hai…
