===================================
Suno hamdam…
Woh kaanch ki chooreyaan
jo tum ne apne hathoon se
Bare pyar se mere hathoon mein
Pehnaee thee
Jo tumhari chaahat se rangeen theen
Jin ki khanak meri zindagi thee
Wohi kaanch ki rangeen chooreyyan
Ab toot ke bikhar chuki hain
Tumhare jaate hi
Waqt ke bereham haathoon ne
Bari bedardi se unhain
Kircheyoon mein badal dia hai
Aur in kircheyoon mein kaheen
Mera be-rang wajood
Bikhra para hai
Jis mein se jaan aahista aahista
Nikal rahee hai
Aur meri zindagi inhee kircheyoon mein
Dhal rahee hai
Ke meri har khushi
Meri zindagi tum hi thay…
===================================
Najaane kitne barsoon se
Woh meri dee huwi
Kaanch ki yeh chooreyaan
Apni muhabbat ki tarah laakh pardoon mein
Chuppa kar aaj tak rakhay huwe hai
Jab kabhi din bhar ke kamoo ki thakkanse choor hoti hai
Tu kamre ke kisi konay mein jaa kar
Apni almaar ka taala kholti hai
Aur bari chaahat se woh in chooreyoon ko
Baari baari apne haathoon per charha kar choomti hai
Chooreyoon ke ghungroon ki chan chan
Haath se sun kar woh maazi ki khushiyaan sochti hai
Aur phir yak’dam kisi aahat ko sun kar chaunkti hai
Yunh sunheri chooreyoon ko phir se yaadoon ki tarah
Sambhaal kar taloon mein rakh kar laut aati hai
Magar ab yeh mera faisla hai
Mein issay in chooreyoon ki qaid se aazaad kar donga
Mein apni dee huwi chooreyoon ko torr kar
Is ki muhabbat ke bharram ko tor donga…