Maa
…
1.
Kabhi-kabhi lagta hai
ki train se chalte hi
maa kheench legi mujhe bahar |
wo chhodne bhi toh
yahi sochkar aati hogi |
Peechhe adhkhule darwaje se
Jhankti thi amma |
train mai tatolta raha bag
der tak lagta raha
ke kuchh bhool aya hun |
Neend mai badbadaati hai
daalein, masaale, lihaaf ke cover
aur jaagte hue
chup si rahti hai
Aajkal maa
Kabhi iss jeb mai
kabhi usme dalti hai
so ka note,
use ab bhi lagta hai
ki mene nahi mange honge
papa se paise |
Phone par batati rahti hain
ki kiska byah hua,
koun mara pados mai |
jhallate rahte hain pita
bill badne par |
Ve kya janein ki
Maa bunana chahti hai apna shahar
mere ird-gird hi |
Uske per dukh rahe the,
mai sahlata raha der tak |
sone ke baad
raat bhar lagta raha
jaise koi haath sahla raha ho |
Bekari ke dino mai
taane deti rahit thi
har shaam khane ke samay,
roti par chupde aate the
bahut saare aansu bhi |
Aajkal naaraaj hain maa |
papa ki chitthiyaN bahut aane lagi hain achanak |
sochti hai ki pahchanunga nahi
uski likhawat |
Chhuttiyo me jati hai kahi
apne ghar ka kahkar
apni saheliyoN
apni maa se milne |
uska ghar
hamare ghar se alag hai
ab bhi shayad |
~ Gaurav Solanki