koe saath na de mera,chalna mujhe aata hai
shaheen sifat hoon main,uRna mujhe aata hai
mushkil mein balaaon mein,hansna meri aadat hai
har mouj e hawadis se,laRna mujhe aata hai
milta hai sukoon mujhko,sohbat mein ghareebon ki
khudgharz ameeron se,bachna mujhe aata hai
hai zulm ameeron ka,dunia mein ghareebi hai
zaalim ke muqaabil mein,datna mujhe aata hai
jhooton ke faraybon se,hai bayr sada mujhko
sacchon ki hifazat mein,marna mujhe aata hai
mitti se bana lekin,hai asl mera paani
behna meri fitrat hai,baRhna mujhe aata hai
momin hoon musalman hoon,main ilm ka talib hoon
gardan ko jahalat ki,kasna mujhe aata hai
bewaaon se hamdardi,hai pyar yateemon se
quran ki naseehat par,chalna mujhe aata hai
haamid hoon mohammed ki,seerat hai ravish meri
insaan ke aebon ko,dhankna mujhe aata hai
By : haamid baaqri
thank you
Allah aap ko aur naiki taufeeq de..