Purani baat hai is sheher may ek shaks rehta tha
Kabhi ham us say mil laytay, kabhi voh ham say mil layta
Kabhi ham muntazir rehtay, kabhi voh muntazir rehta
Taaluq vajbi sa tha, rafaqat aarzi si thi
Mananay rooth janay ki kabhi naubat nahi ayee
Hamaray darmiyan bas ek khuloos-e-dil ka rishta tha
Mulaqaton may aksar chashm-o-lab khamosh rehtay they
Agarchey soch ki had tak bohat parvaaz kartay they
Magar ek doosray ka hamsafar honay say dartay they
Ta’ajub hai kay milnay par na jis say baat hoti thi
Usay bichRay hoay ham say zamanay ho gai lekin
Voh abhi yaad ajaaye
To peechay muR kar jo ham daykhain
To apni zaat youn bikhri paRi rahon may milti hai
Hazaron koshishon say voh agar yakja bhi ho jai
Badal jatay hain aksar is tarah ijzaye tarkeebi
Kay ham say khud bhi apna aap pehchana nahi jata
Sarvar Amaan
Ijzaaye tarkeebi – ingredients
