Aadaab arz dosto!
Ek ghazal pesh-e-Khidmat hai. Aap sab kii raaey kaa intezaar rahegaa.
**Ghazal
behijaabaanaa jo ghar se chal diyaa baahar ko maiN
kyaa chhupaauuN jism ko ab kyaa chhupaauuN sar ko maiN
jaantaa huuN ek din miTTii meN sonaa hai mujhe
kyaa karuuNgaa ghar meN laa kar phuul se bistar ko maiN
dhuup jab duniyaa kii takliifoN ki hotii hai kaRii
Daal letaa huuN badan par sabr kii chaadar ko maiN
ab tabii’at is paraaye des meN ghabraa gayii
dil yeh mujh se kah rahaa hai laut jaaoon ghar ko maiN
ai Khudaa itnii ataa kar taaqat-e-iimaaN mujhe
past kar daaluuN akelaa jhuuT ke lashkar ko maiN
ik nazar kaa tiir aayaa jaan merii le gayaa
dekhtaa hii rah gayaa us qatl ke manzar ko maiN
khench luuN to bewafaaii chhoR duuN to maut hai
kis tarah dil se nikaaluuN aap ke nishtar ko maiN
mujh ko ‘Waseem’ raah-e-duniyaa kii chamak bhaane lagii
bhuul hii jaauuN na is meN manzil-e-mahshar ko maiN !!!**
Waseem Ahmed
