Har aek chehray pe aek chehra
Saja hay aesa
K jesay sikkay k do rukhoN main
Bati Haqeeqat
Magar ye chehray pe aek chehra
FusooN hay yaaro!
Aor aesay chehroN ki kia kami hay!
Har ik nagar main hazaar chehray…………..Meri zameen par muhabbatoN ki
Hazaar rangoN main fasl-e-gul ki
Hazaar sadyuN say khaitiaN lehlahaa rahi theeN
Ye ik sadi jo azaab ban kar
Hamaray gulshan main aabasi hay
Bataao mujh ko, Namoo kahan par hoi hay iski
Ye kis sitaray nay isko janma
Kaheen purani kisi sadi ki
Sisakti, khooN thookti, dam-e-marg par taRaptii
JaRoN nay joRa hay raabita koi is sadi say
Jo taza-kaari k ik fusooN say
Hoi hay ma’noon
Jis nay chehroN pe aek chehra mazeed thopa
Ye ik izaafi
Ye aek khooneeN
Ye aek be-dard
PattharoN jesa sakht chehra
Aor aesay chehray hain ab hazaaroN
Har ik nagar main………………
Fiza ko dekho!
Ye kia fusooN say bhari nahi hay?
YahaN pe masoomiat say khilwaaR kis nay khaila?
Ye main nay khaila
Ye tum nay khiala
Ye is nay khaila
Ye os nay khaila
Sabhi nay mil k yahaN pe looti hay iski Ismat
Kabhi zameeN ki hudood k naam say he lootii
Kabhi kisi zan k narm naqsh-o-nigaar apnay
Kareeh dantoN say aesay nochay
K apni pehchan bhool baithay
Kabhi tu ghairat pe thook kar apni
BaitioN k huqooq khaa k
Aor in say baRh kar
Kabhi Khuda-o-rasool k naam par bhi aayi na sharm
koi
Khudaaye bartar nay aasmaaN say khuli hidayat
utaar di hay
Magar ye mulla, ajeeb mulla
Ajeeb in ki sharii’atain hain
Jo in say katraa k jaayeN tu ye utaar dain un ki gardanaiN bhi
Kabhi siyasi, kabhi ma’ashi
Hain ahmaqoN k ajeeb na’ray…
JahaN pe jis ko zara sa moqa bhi mil gaya hayWaheeN pe os nay
ZameeN ki ismat bhanbhoR di hay……………..
Ye is sadi k kareeh chehray hain
Jin ki ta’daad hay hazaaroN
Har ik nagar main
Mujhay tu afsos bus yahi hay
k hum paRay hain agar magar main
Kabhi chupatay hain apna chehra
Jo khooN say rangeeN, kata phata hay
Kabhi dikhatay hain aesa chehra
Hay jis pe masoomiat ka pehra
Aray ae logo…
Ajeeb logo!
Ye kia tamasha laga rahay ho
Ye kesay chehray dikha rahay ho
FusooN main liptay
DhuwaaN say chehray!
Kabhi haqeeqat say bhi nigaahain milaao logo
K tum tu laachaargi k aalam main
Taaza-kaari ki is sadi main
Baghair chehray k jii rahay ho!
