barsoN tumhaari yaad meiN jalta rahaa hooN meiN
sar meiN tumhaare piyar ka saudaa liye hue
lekin ab intizaar ka yaaraa nahiN mujhe
kab tak jiuN meiN aankh meiN darya liye hue
rasm o rivaj e dehr maiN jakRi hui ho tum
maiN jaantaa hooN ,tum se mujhe kuch gilaa nahiN
yeh maah o saal hijr ke kaate haiN jiss tarhaa
ab aur kaatne ka mujhe hoslaa nahiN
mere liye bahaar-o-khizaaN eik se heiN sab
ab ke baras bahaar meiN hogi na kuch namood
ab tum ko bhool jaane ki koshish karooN ga meiN
ab aatish-e-firaaq meiN jaltaa hai sab wajood