Buhat shuro mein is nazm ko eik baar post kar chuki hooN per aaj phir dil chaha is ko share karney ko…
**Khushgawaar mousam mein
anginat tamashaii
apni apni teamooN ko
daad deny aaty hain
apny apny piyarooN ka
housla barhaty hain
maiN alag thalag sab sy
barahween khilarhi ko
hoot karta rehta hoon
Barhwaan khilarhi bhi
keya ajab khilarhi he
khail hota rehta he
shoor machta rehta he
daad parti rehti he
our woh alag sab sy
intezaar karta he
eik aisi sa’at ka
eik aisy lamhy ka
jis mein saniha ho jaye
phir woh khailny nikly
taaliyooN key jhurmutt mein
eik jumla-e-khush-kun
eik naraa-e-tehseen
us ky naam par ho jaye
sab khilarhiyooN ky sath
woh bhi muhtabir ho jaye
Par yeh kam hi hota he
phir bhi loog kehty hain
khail sey khilarhi ka
umrr bhar ka rishta he
umr bhar ka yeh rishta
chhott bhi to sakta he
aahri wisl ky sath
doob jany wala dil!
toot bhi to sakta he!
Tum bhi “Iftehar Aarif”
barhweeN khilarhi ho
intezaar karty ho
eik aisi sa’at ka
jis mein hadsa ho jaye
jis mein saaniha ho jaye
tum bhi Iftehar Aarif
Tum bhi doob jawo gy
Tum bhi toot jawo gy!!!**
-Iftehar Aarif
k: