Bajaaye ashk, lahoo chashm_e_tar main rakhta hon,
Sajaa k gham ki amaanat ko ghar main rakhta hon,
Nahi hai khof mujhe, raah k andheron ka,
K manzilon k ujaale, nazar main rakhta hon,
Wo ik tarrap, jo nahi bijliyon ko bhii haasil,
Main apne toote hoye baal-o-per main rakhta hon,
Ye aur baat hai, khaamosh hon sar_e_mahfil,
Hazaar shikwe dil_e_gham-asar main rakhta hon,
Tera khayaal, teri aarzoo, tere jalwe,
Na poochh mujh se, main kia kia nazar main rakhta ho,
Main kia bataon k kin azmaton ka haasil hai,
Jo zoq_e_bandagi main apne sir main rakhta hon,
Na jaane kon si jaanib se koi aa jaaye,
Jalaa k shama her ik rah-guzr main rakhta hon,
Qafas main mujh ko zamaana howa magar Kaawish,
Junoon_e_rifat_e_parwaaz sir main rakhta hoon…!!!