BaariSH hui tu PHooloN kay tan CHaak ho gaye
Mausim kay haaTH BHeeg kay saffak ho gaye
Baadal ko kia KHabar hai keh baariSH kee CHaah maiN
Kaisay bulund o baala SHajar KHaak ho gaye
Jugnoo ko din kay waqt paraKHnay kee zid karaiN
BaCHCHay hamaray ahad kay CHalaak ho gaye
Lehra rahi hai baraf kee CHaadar haTa kay GHaas
Sooraj kee SHayh pe tinkay BHi bebaak ho gaye
Basti main jitnay AAb gazeeda thay sub kay sub
Darya kay ruKH badaltay hee tairaak ho gaye
Sooraj dimaaGH log BHi iblaaGH e fikr maiN
Zulf e SHab e firaaq kay peCHaak ho gaye
Jab BHi GHareeb e SHahar say kuCH guftagoo hui
Lehjay hawaay e SHaam kay namnaak ho gaye