Zindagii ke meley mein
Khwaahishon ke reley mein
Tum se kyaa kahein jaanaa
Is qadar jhameley mein
Waqt ki ravaani hai
Bakht ki giraani hai
Sakht bezamini hai
Sakht laamakaani hai
Hijr ke samander mein
Takht aur takhtey ki
Aik hi kahaani hai
Tum ko jo sunaani hai
Baat go zara si hai
Baat umr bhar ki hai
Umr bhar ki baatein kab
Do ghari mein hoti hein
Dard ke samander mein
Anginat jazirey hein
Beshumaar moti hein
Aankh ke darichey mein
Tum ne jo sajaya tha
Baat us diey ki hai
Baat us giley ki hai
Jo lahu ki khilvat mein
Chor ban ke aata hai
Lafz ki fasilon par
Toot toot jaata hai
Zindagi se lambi hai
Baat rat-jagey ki hai
Raastey mein kaise ho
Baat takhliey ki hai
Takhaliey ki baaton mein
Guftagu izaafi hai
Pyaar karney Waalon ko
Ik nigah kaafi hai
Ho sakey to sun jaao
Aik din akeley mein
Tum se kya kahein jaanaa
Is qadar jhameley mein