Mein kitni waraftagi se ussay suna raha thaa
Woh saari baatain woh saaray qissay
Jo us se milnay se paish-tar
Meri zindagi ki hikayyatain theen
Mein keh raha thaa
Ke aur bhi log thay
Jinhain meri aarzoo thee meri tallab thee
Ke jin ki mujh per inayattain theen
Mein keh raha thaa
Ke in mein kuch ko tau mein ne
Jaan se azeez jaana
Magar in mein se baa’z ko
Meri be-dilli se shikayattain theen
Mein ek ek baat
Aik aik jurm ki kahaani
Dharaktay dil kaanptay badan se suna raha thaa
Magar woh patthar bani
Mujhe aise sunti rahi
Ke jaise mere laboon per
Kisi muqaddas tareen sahefay ki ayattain theen …
“Ahmed Faraz”
