**Kaifi 'Azmii saaHib marHoom kii ek nazm ba 'unwaan “abdeshe” jise film “Haqeeqat” m:eN musta’mil kiyaa gayaa thaa. is nazm ke jo band Film meN iste’maal kiye gaye the unkii maiN (*) ke zarii’ye nishaan_dehii kar rahaa huuN: film waale band ba_nisbat Ghair filmi band ke aasaan zabaan meN haiN. bahot pyaarii nazm hai…aap bhii maHzooz ho lijiiye.
**
andeshe
ruuH bechain hai, ik dil kii aziiyat kia hai
** dil hii sho’laa hai to ye soz-e-moHabbat kia hai**
** vo mujhe bhuul gaii, iskii shikaayat kia hai**
** ranj to ye hai k ro-ro ke bhulaayaa hogaa**
** vo kahaaN aur kahaaN Khaahish-e-Gham, sozish-e-jaaN**
** us kii rangiin nazar aur nuquush-e-HirmaaN**
** us kaa aiHsaas-e-latiif aur shikast-e-armaaN**
** taana_zan ek zamaana nazar aayaa hogaa**
** jhuk gaii hogii javaaN-saal umangoN kii jabiiN**
** miT gaii hogii lahek, Duub gayaa hogaa yaqiiN**
** chhaa gayaa hogaa dhuaaN, ghuum gaii hogii zamiiN**
** apne pahle hii gharaunde ko jo Dhaayaa hogaa**
** (*) sung by Bhupendra**
** dil ne aise bhii kuchh afsaane sunaaye hoNge**
** ashk aaNkhoN ne piye aur na bahaaye hoNge**
** band kamre meN jo Khat mere jalaaye hoNge**
** ek-ik Harf jabiiN par ubhar aayaa hogaa**
** (*) sung by MoHammad Raf’ii**
** us ne ghabraa ke nazar laakh bachaaii hogii**
** miTke ik naqsh ne sau shakl dikhaaii hogii**
** mez se jab mirii tasviir haTaaii hogii**
** har taraf mujhko taRaptaa huaa paayaa hogaa**
** (*) sung by Tal’at maHmood**
** be_mahel chheR pe jazbaat ubal aaye hoNge**
** Gham pashemaan tabassum meN Dhal aaye hoNge**
** naam par mere jab aaNsuu nikal aaye hoNge**
** sar na kaaNdhe se sahelii ke uThaayaa hogaa**
** (*) sung by Manna Day**
** zulf zid kar ke kisii ne jo banaaii hogii**
** ruuThe jalvoN pe KhizaaN aur bhii chhaaii hogii**
** barq ashvoN ne kaii din na giraaii hogii**
** rang chehre pe kaii roz na aayaa hogaa**
** ho ke majbuur mujhe us ne bhulaayaa hogaa**
** zahr chupke se davaa jaan ke Khaayaa hogaa**
