ruuH be_chai’n hai, ik dil kii aziiyat kia hai
dil hii sho’la hai to ye soz-e-moHabbat kia hai
vo mujhe bhuul gaii, iskii shikaayat kia hai
ranj to yeh hai k ro-ro ke bhulaayaa hogaa
vo kahaaN aur kahaaN khaa’iif-e-Gham, sozish-e-jaaN
us kii rangiin nazar aur nuquush-e-HirmaaN
us kaa ehsaas-e-latiif aur shikast-e-armaaN
ta’na_zan ek zamaana nazar aayaa hogaa
jhuk gaii hogii javaaN_saal umangoN kii jabiiN
miT gaii hogii lapak, Duub gayaa hogaa yaqiiN
chhaa gayaa hogaa dhuaaN, ghuum gaii hogii zamiiM
apne pahle hii gharaunde ko jo Dhaayaa hogaa
dil ne aise bhii kuchh afsaane sunaaye hoNge
ashk aaNkhoN ne piye aur na bahaaye hoNge
band kamre meN jo Khat mere jalaaye hoNge
ek ik Harf jabiiN par ubhar aayaa hogaa
us ne ghabraa ke nazar laakh bachaaii hogii
miTke ik naqsh ne sau shakl dikhaaii hogii
mez se jab merii tasviir haTaaii hogii
har taraf mujh ko taRaptaa huaa paayaa hogaa
be_mahel chheR pe jazbaat ubal aaye hoNge
Gham pashemaan tabassum meN Dhal aaye hoNge
naam par mere jab aaNsuu nikal aaye hoNge
sar na kaandhe se sahelii ke uThaayaa hogaa
zulf, zid kar ke, kisii ne jo banaaii hogii
ruKh ke jalvoN pe KhizaaN aur bhii chhaaii hogii
barq ‘ashvoN ne kaii din na giraaii hogii
rang chehre pe kaii roz na aayaa hogaa
ho ke majbuur mujhe us ne bhulaayaa hogaa
zahr chhp kar ke davaa jaan ke Khaayaa hogaa
Kaifi Azami