Aik Nazm,
Ik Din Ik Pagal Larki Ne
Apne Ghar Ki Oonchi Chhat Se
Apne Saray Khuab Utaray
Khuahish Ke Tukro’n Ko Jora
Geelay Kapre
Taiz Hawa Ke Hath Se Chheenay
Kalay Harfo’n Walay Kaghaz
Purse Main Rakhay
Peelay Chand Ki Pheeki Chha’on
Apni Kachi Aankhon Ander
Aap Samaitay
Rishto’n Ki Zanjeerain Tor Ke
Ghar Se Nikli
Sheher Ki Saari Roshnion Ne
Uss Ki Aankhain
Rang Birangi Dewaro’n Per
Chas’paan Ker Deen
Jaagti Soti Aankho’n Wali Uss Larki Ne
Murr Ker Dekha
Ghar Janay Ke Saray Rastay
Uss Se O’jhal–
Aankhain Bojhal!!
Abb Wo Apne Aap Ko Jese Dhoond Rahi Hai
Her Janib Anjanay Saye
Uss Se Aankhain Maang Rahay Hain
Aur Wo Her Ek Morr Pe Ruk Ker
Apne Aap Se Pooch Rahee Hai
Apne Ghar Ka Pehla Rasta!!
Wo Kitni Pagal Larki Thi—!
Aur Wo Tum Ho !!
(Mohsin Naqvi)
Umeed Hai Aap Logon Ko Pasand Aye Gi..
Regards..