Dareecha khula mein nai dekhaa
Wahaan khubsoorat, haseen haath mein
B.A, M.A ki degree mein malfoof
Shampoo ki sheeshi, creamoun ki dibiya
Kahin doosrey haath par lipstick, nail polish dhari thi
Chamakti jabeen, muskurata hua saada masoom chehra
Suno, mei baaji
Sunn aae meri bibi
Suno meri pyaari si aunty
Yeh saaman-e-zeenat tumharey liye behtreen hai
Taaruf ki khaatir bhut hi hai sastaa
Tumharey liye hai faqat das rupay mein
Faqat das rupay mein
Yeh mein aik boorhaa, tahaiiur se ghabra ke betha
Dareecha khulaa, yaad-e-maazi mein jhaankaa
Mujhe yaad aayaa
Mein bachpan mein aangan mein betha hua khelta tha
Mujhe yaad hai aik kaali kaluti si moti si aurat
Hamarey yahan chooriyan bechney aayaa karti thi aksar
Kabhi khaas kar eid par, saanwali larkiyaan,
Nangey paon, saroun par uthaaey huey guggu ghorey
Sadaa deti aati thein, le lou
Faqat aik mutthi ka aataa hai, qeemat hamarey hunar ki
Yeh le lou
Hamara yehi rizq hai meri amman, yeh le lou
Mein nanha saa masoom bachcha
Ta’ajubb se ammi se yeh poochta tha
Bataa meri ammi ke larki yeh in guggu ghoroun se khud kyun nahin khelti hai
Tujhe kya khabar merey baitey!
Yeh roti ke dhandey
Yeh sab pait bharney ke heeley
Yeh rozi kamaaney ke sab silsilay hein
Khuda se yeh meri dua hai ke baitey
Tujhe rizq waafir ataa ho khuda se