**
Kis khauj mein niklay ho
aik lamhay ko thehro tu
zindagi kay sabhi zaaiqay aas paas hi rehtay hain
aur tum yu’n qadam pay qadam uthaaye jaa rahay ho
apni pehchaan ko chor kay peechay
khud hi aaghay barhtay jaa rahay ho
ajnabiyat kay faslaay barhaatay jaa rahay ho
aik lamhay ko thehro to
kin bay-naam manzilo’n ko niklay ho
kin anjaanay rastoon pay chalay jaa rahay ho
zindagi kahin aur door nahin
basi hai tumharay sang yaheen kaheen
kyoun dooriyoon mein sukoon kay mutlashi ho
ruko, aik lamhay ko thehro to
jis muqaam say chalay thay
us muqaam ko samajhtay to
ab bhi chalay jaa rahay ho
udaasiyoon ki dhool uraatay jaa rahay ho
chaltay rehnay say kabhi rastay khatam nahin huay
bay-naam manziloon kay safar kabhi khatam nahin huay
kis an-daikhay milan ko tarsay jaa rahay ho
jo ghariyaan abhi hain
in ki qadar kiyay bina hi jaa rahay hoo…!
