**aadaab, dosto! **
ek haaliya Ghazal pesh-e-Khidmat hai. mulaahiza farmaaiye aur apnii raae se navaaziye.
**Ghazal
ai dost! jo tuu misl-e-rag-e-jaaN nahiiN hotaa
to hijr tiraa baais-e-hirmaaN nahiiN hotaa
jo raah-e-muhabbat pe chalaa, faKhr-e-jahaaN hai
sholoN se guzarnaa koii aasaaN nahiiN hotaa
sochaa to kayii baar, bhulaa duuN tujhe lekin
ye kaam kisii taur, mirii jaaN! nahiiN hotaa
jal uThte haiN aaNkhoN ke diye yaad se terii
vaise to kabhii ghar meN chiraaGhaaN nahiiN hotaa
ham lutf se tanhaayii ke mahruum hii rahte
qismat meN agar apnii biyaabaaN nahiiN hotaa
be.suud hai tadbeer-e-ilaaj-e-Gham-e-ulfat
is rog kaa, ai dil! koii darmaaN nahiiN hotaa
dekhe haiN bahut aaj kii dunyaa kii tamaashe
ab zahn kisii baat pe hairaaN nahiiN hotaa
har dil meN Khudaa ho ye zaruurii nahiiN :Waseem:
har sajda ba.sar shaKhs musalmaaN nahiiN hotaa !!!
Waseem Ahmed**
