- Ahmed Faraz ki JaanaaN JaanaaN *
(Presented on the Demand of Someone
for the Users of Gupistan Forum)
Ab kay tajdiid-e-vafaa kaa nahi imkaaN jaanaaN
yaad kyaa tujh ko dilaayeN teraa paimaaN jaanaaN
yuuN hi mausam ki adaa dekh kay yaad aayaa hay
kis qadar jald badal jaatay hain insaaN jaanaaN
zindagii terii ataa thii so tere naam ki hay
ham nay jaise bhi basar ki teraa ehasaaN jaanaaN
dil ye kahataa hay ki shaayad ho fasurdaa tuu bhi
dil ki kyaa baat karen dil to hay naadaaN jaanaaN
awwal-awwal ki muhabbat kay nashe yaad to kar
bepiye bhi teraa cheharaa thaa gulistaaN jaanaaN
aaKhir aaKhir to ye aalam hay ki ab hosh nahi
rag-e-miinaa sulag uThii ki rag-e-jaaN jaanaaN
muddaton say yehi aalam na tavaqqo na umeed
dil pukaare hi chalaa jaataa hay jaanaaN jaanaaN
ham bhi kyaa saadaa thay ham nay bhi samajh rakhaa thaa
gham-e-dauraaN say judaa hay gham-e-jaanaaN jaanaaN
ab ki kuchh aisii sajii mahafil-e-yaaraaN jaanaaN
sar-ba-zaanuu hay koii sar-ba-girebaaN jaanaaN
har koii apanii hi aavaaz say kaaNp uThataa hay
har koii apane hi saaye say hiraasaaN jaanaaN
jis ko dekho vahii zanjiir-ba-paa lagataa hay
shehr kaa shehr huaa daaKhil-e-zindaaN jaanaaN
ab teraa zikr bhi shaayad hi ghazal men aaye
aur say aur huaa dard kaa unvaaN jaanaaN
ham ki ruuThii huii rut ko bhi manaa lete thay
ham nay dekhaa hi na thaa mausam-e-hijraaN jaanaaN
hosh aayaa to sabhii Khvaab thay rezaa-rezaa
jaise urrate huye auraaq-e-pareshaaN jaanaaN