One of my most favorite.
Kuen her cheez adhoori milti hai mujhay
Kuen koi bhi cheez nahi’n poori hoti
Kuen poora rona bhi nahi’n aata mujh ko
Kuen main poori trha hans nahi’n pata hoon
Kuen her jazbay, her ehsas pay tera saya parta hai
Kuen koi jazba poora mera bhi nahi’n honay pata
Kuen main poora tera bhi nahi’n honay pata
Lakin main apna bhi nahi’n rehnay pata
Hijr ki kuen takmeel nahi’n honay pati
Wasl mukamal akhir kuen nahi’n ho pata
Khwaboon ka manzar kuen dhundla rehta hai
Kuen tabeeroon main posheeda koi sapna rehta hai
Jis duniya main koi apna rehta hai
Us duniya main dushman bhi koi aa basta hai
Achai k sath burai rehti hai
Oor burai main bhi koi tum sa acha rehta hai
Achai ki kuen takmeel nahi’n hoti
Kuen yay sab kuch bura nahi’n honay pata
Koi mohobbat ager mukamal ho pati
Koi ishq ager poora sacha hota
To phir koi ishq na kernay pata
To phir koi mohobbat na honay pati
Ishq main ab tk aik tasalsul qayam hai
Oor mohobbat poori hona baqi hai
Isi liyay main baqi hoon, tum baqi hoo
Isi liyay main aadha hoon, tum adhi ho
Hum takmeel ko miltay hain to joor laga reh jata hai
Phir doori reh jati hai
Oor phir takmeel nahi’n hoti