Abhi Ye Zakhm Taaza Hai Abhi Kuch Din Guzarnay Do
Abhi Uss Bewafa Ki Yaad Main Dil Ko Behelnay Do
Woh Uski Be’Rukhi Aur Barf Main Lipta Hua Lehja
Chamaktay Chaand Ki Surat Koi Anjaan Sa Chehra
Woh Meray Pyaar Ke Ehsaas Ka Toota Hua Lamha
Mujhe Bikhri Hui Yado’n Ke Aangan Main Jhulasnay Do
Abhi Ye Zakhm Taaza Hai Abhi Kuch Din Guzarnay Do
Muhabbat Aaj Kal Ke Daur Main Aisi Kahani Hai
Koi Kirdaar Baaqi Hai Na Lafzo’n Main Rawani Hai
Hamaray Paas Abb Guzray Dino’n Ki Ik Nishani Hai
Ye Gham Ki Shaam Hai Iss Ko Meray Ghar Main Utarnay Do
Abhi Ye Zakhm Taaza Hai Abhi Kuch Din Guzarnay Do
Abhi Kuch Din Guzarnay Do Ke Apnay Aap Main Aa’on
Mujhe Tanha Sulagnay Do Ke Apnay Aap Main Aa’on
Mujhe Pal Pal Bikhernay Do Ke Apnay Aap Main Aa’on
Bhula Ker Yaad Uss Ki Khuaab Ke Manzar Badalnay Do
Abhi Ye Zakhm Taaza Hai Abhi Kuch Din Guzarnay Do
Bataya Tha Tumhain Ke Chaahat Kuch Nahi Hoti
Ye Aisa Daur Hai Jis Main Muhabbat Kuch Nahi Hoti
Woh Sab Jhootay Fasaanay Thay Haqeeqat Kuch Nahi Hoti
Muhabbat Daiv’ta Ki Ab Mujhe Tauheen Karnay Do
Abhi Yeh Zakhm Taaza Hai Abhi Kuch Din Guzarnay Do
