ab ye khuwahish hai ke apna humsafar koi na ho
juz shab-e-tanha, shareek-e-rahguzar koi na ho
raat ke pichle pehar ki khamshi ke khauf ko
us se pucho, shehr bhar main jis ka ghar koi na ho
jal rahay hain baam-o-dar aur mutma’in betha hon main
ghar ki barbadi se itna be khabar koi na ho
dard itna ho ke bol uthay sakoot-e-shehr-e-jaan
zakhm aisa de ke jis ka chaara gar koi na ho
sohbatoon ke khwaab dekhun raat bhar Mohsin magar
subah-dum ankhain khulain to baam per koi na ho