Har rehguzar mein bheer thee logoon ki isqadar
Ek ajnabi se shaks ke manoos khadokhaal
Haathoon se gir ke tootay huwe aaenaa-e-misaal
Jaise tamaam chehroon mein taqseem hogaye
Ek kehkashaan mein laakh sitaaray samoo gaye
Woh din, woh rutt, woh wakt, woh mausam, woh sar khushi
Ay gardish-e-hayyaat, ay raftaar-o-maah-o-saal
Kya jamaah is zameen pe na honge phir kabhi ?
Jo hamsafar firaaq ke dal-dal mein khoo gaye
Pattay jo gir ke pair se, rastoon ke hogaye
Kya phir kabhi na laut ke aayegi woh bahaar
Kya phir kabhi na aankh mein uttregi woh dhanak
Jis ke wafoor-e-rang se chalkhi huwi hawa
Karti hai aaj tak
Ek zulf mein sajjay huwe pholoon ka intezaar
Lamhay, zamaan-ae-hijar ke, phailay kuch is tarah
Raig-e-rawaan-e-dasht ki tamsaal hogaye
Is dasht-e-pur-suraab mein bhatkay hain isqadar
Naqsh-e-qadam thay jitnay bhi, pamaal hogaye
Ab tu kaheen pe khatam ho rasta gumaan ka
Sheeshay mein dil ke saaray yaqeen, baal hogaye
Jis wakeyay ne aankh se cheeni thee meri neend
Us wakeyay ko ab tu kaee saal hogaye …**