ek pal mein ek sadee kaa mazaa ham se poochhiye
do din kee zindagee kaa mazaa ham se poochhiye
bhoole hain unhein raftaa raftaa mudatton mein ham
qishton mein Khud-kushee kaa mazaa ham se poochhiye
aagaaz-e-aashiqee kaa mazaa aap jaaniye
anjaam-e-aashiqee kaa mazaa ham se poochhiye
jalate diyon mein jalate gharon jaise zau kahaan
sarakar raushnee kaa mazaa ham se poochhiye
vo jaan hee gaye ke hamein un se pyaar hai
aankhon kee muKhbaree kaa mazaa ham se poochhiye
hansane kaa shauq ham ko bhee thaa aap kee tarah
hansiye magar hansee kaa mazaa ham se poochhiye
ham taubaa kar ke mar gaye bemaut ai ‘Khumar’
tauheen-e-maikashee kaa mazaa ham se poochhiye