Uljhey huwey afkaar aur behka huwa shaoor
ghat’ti hui gheirat aur barrhta huwa gharoor
meeraas-e-nasb-o-nasq yani fann-e-harb jis ka
lamha-ba-lamha hathoN sey nikalta huwa aboor
behti hui ganga meiN haath dhoney ki khaahish
har jatey lamhey neeyatoN meiN aata huwa fatoor
Ye meiN hooN merey dosto – aaj ka musalmaan
Haathon meiN ik Kitaab ke siwa kuch bhi nahi hey
aankhoN meiN ik khaab ke siwa kuch bhi nahi hey
wo khaab jo merey ajdaad ki himmat ka ameeN hey
wo himmat merey baazuoN meiN aaj jis ki kami hey
maazi ke mazaaroN pe jesey katboN ke nishaaN heiN
maathey pe merey ultey seedhey sajdoN ke nishaaN heiN
Ye meiN hooN merey dosto – aaj ka musalmaan
Wo “dasht-o-darya” meiN ghorroN ko dorraney waala
mahjabeenoN ki zulfoN meiN phaNcha bettha hey
kal ka “shaheen,” pahaarroN pe tha thikaana jis ka
aaj husn waloN ke daaman sey laga bettha hey
jo Arb ke sehraoN sey nikla tha le ke aafaaqi payaam
wo imaan-o-taqaddus ke asbaaq bhuley bettha hey!
~~~~~~~~
phiRa aj haq kaliye jaa’N fida karay koi
wafa bhi jhooM uthay yo wafa karay koi
nimaaZ 14 sadi se hai muntaziR logo|
HussaiN ke tarha aye ada karay koi
~~~~~~~~~
~~Experience is the worst teacher; it gives the test before presenting the lesson.~~*
Thanx everyone for appreciating my work continuously. aap logoN ka shurkia adaa karney ke leeye merey paas alfaaz nahi heiN…lekin phir bhi, bohat bohat shukriya
bohat achay mozoo per likhi hai, aur theek kaha hai ke: yea waqt nahiN hai ulfat ke rangeeN taranay ganay ka. lekin beharhal yea jo kuch bhi ho raha hai dil toRnay ke liay nahiN hai, bulkay yea hi waqt hai nikharnay ka aur saNwarnay ka. Aur inshaAllah musalman iss test se surkhroo nikleiN ge.
Aap ki nazam peRh kar mera bhi kuch kehnay ko ji chaha so hazir hai:
yea sitam jaga raha heiN mera soya hua sha'oor
taziana heiN meri ghairat pe kuffar ka ghuroor
tun Aasani kuch Aai thi dolat-e-dunia se zaroor
tha kuch meray maghrib-zada Aabaa' ka qusoor
Afghanah meiN zameen ke sath meri neend bhi gai
sehal pasandi aur maslihat ki takeed bhi gai
her zakhm ke badlay ik zakhm dena hai in ko
qatal ke baad, ghiza-o-dirham dena hai in ko
iss sitam zareefi ki saza hai dukh denay wali tabahi
yea badal, mujhe Rab ki qasam, dena hai in ko
le Aanay do sath inheiN apne her ibleesi machine ko
ke Aaj mein ne tham lia hai phir apne yaqeen ko
meiN Aaj ka musalmaN hooN
meiN Aaj phir musalmaN hooN
Musharraf hukoomat ke shehrioN:
"Ana bari-um-minkum"