"aaina mujh ko ..."

Arts & Culture Poetry ( Intikhaab & Sho'ra-e-Gupshup)
1

aadaab, dosto!

ek taaza Ghazal pesh-e-Khidmat hai. mulaahiza farmaaiye aur apnii raae se navaaziye.

**Ghazal

aaiina mujh ko pas-o-pesh meN taktaa kyuuN hai
mujh meN Khaamii hai to kahne meN jhijhaktaa kyuuN hai

justujuu jis kii ho aisaa to nahiiN kuchh mujh meN
ek saayaa mire atraaf bhaTaktaa kyuuN hai

tujh se kuchh rabt nahiiN hai to bhalaa teraa Khayaal
phuul ban kar mirii saaNsoN meN mahaktaa kyuuN hai

tuu ne Khud raah-e-muhabbat ko chunaa thaa, ai dil!
ab ye tanhaayii meN raatoN kii sisaktaa kyuuN hai

kaun aayegaa mire paas, kise fursat hai
dil-e-deevaana har aahaT pe dhaRaktaa kyuuN hai

vaaqif-e-ishq nahiiN jo vo bhalaa kyaa jaane
maut ke muNh meN bhii parvaana thiraktaa kyuuN hai

be.zarar zarra-e-Khaashaak saa meraa ye vujuud
jaane ahbaab kii aaNkhoN meN khaTaktaa kyuuN hai

jeete jee laash kii maanind koii ho jaaye
is qadar jism rah-e-dahr meN thaktaa kyuuN hai

kaise maanuuN ki bahut Khush ho yahaaN tum :Waseem:
Gham nahiiN hai to phir aaNkhoN se Tapaktaa kyuuN hai !!

Waseem Ahmed **

2

Re: “aaina mujh ko …”

Wah… Buuhut Zabardast… Beautiful As usual… :slight_smile:

Thanks For Sharing Waseem :flower1:

3

Re: "aaina mujh ko ..."

Very nice.

Jism laash ki maanind ho jaanay ke baad bhi
Izhaar ke liey itnaa machultaa kyuun hai?

Jub "Wohi ho ga jo qismat me likhaa ho gaa"
To "yeh dil aakhir gilaa kartaa kyuun hai"?

4

Re: “aaina mujh ko …”

Waseem bohat achi ghazal hey :):k:…thanks for sharing with us.

5

Re: "aaina mujh ko ..."

Hameshaa ki tarah... pur-wazan ghazal... Bahut hi achi hai... Thank you for sharing :-)

6

Re: “aaina mujh ko …”

E.X.A.C.T.L.Y :slight_smile: