aadaab, dosto!
ek taazah nazm pesh hai. ye taKhleeq ek ajeeb zahnii kaifiyyat kii akkaas hai. maaluum nahiiN aap meN se kitne is kaifiyyat se guzre haiN. baharhaal, nazm pesh hai. hasb-e-maamuul, aap kii raae kaa intizaar rahegaa.
nazm: “lekin”
**college kaa yaum-e-aaKhir hai, soch rahaa huuN
sharm se aaj chuRaa hii DaaluuN apnaa daaman
tum se maaNguuN kuchh lamhe maiN apnii Khaatir
aaj ijaazat de de gar seene kii dhaRkan
mausam kii kuchh baat karuuN, kuchh shahr kii tum se
baatoN baatoN meN apne haalaat bhii kah duuN
vo saare ash.aar jo tum par kahe haiN maiN ne
arz karuuN aur un meN dil kii baat bhii kah duuN
vo saare Khat jo likkhe aur bhej na paayaa
aaj vo saare paRh kar tum ko Khud hii sunaa duuN
aaj uThaa duuN pardaa har ik raaz se apne
vo jo ab tak seene meN hai, tumheN bataa duuN
ho saktaa hai tum bhii dil hii dil meN mujh se
ishq kiyaa kartii ho, kahne se Dartii ho
shaayad mere ulfat ke paiGhaam ko paa kar
tum haaN kah do aur mirii dunyaa hii badal do
lekin…
lekin ye bhii to mumkin hai, aur koii ho
mere jaisaa deevaanaa chaahat meN tumhaarii
aur sameTe apnii saarii himmat vo bhii
kartaa ho izhaar-e-muhabbat kii tayyaarii
naa.insaafii hogii us ke saath baRii ye
gar maiN tum se tum ko maaNguuN aur paa bhii luuN
ik jazbaa rah rah kar mujh se ye kahtaa hai
pahle saa Khaamosh rahuuN, hoNToN ko sii luuN
sab ko raah-e-ishq kii manzil mil jaatii ho
aisaa is dunyaa meN aaKhir kab hotaa hai
laakhoN Ghunche be.chaTKhe hii murjhaate haiN
ek agar phir murjhaa jaaye to bhii kyaa hai !!!**
**Waseem Ahmed**
