Re: maiN khayaal hooN kisi aur ka, mujhay sochta koi au hai…
*mein Khayal hoon kisi aur ka mujhe sochta koi aur hai *
*sar-e-aaina mera aks hai pas-e-aaina koi aur hai *
mein kisi ke dast-e-talab mein hoon to kisii ke harf-e-duaa mein hoon
*mein naseeb hoon kisi aur ka mujhe maangta koi aur hai *
*kabhi laut ayein to na puchna sirf dekhna bade gaur se *
*jinhein raaste mein Khabar hui ke ye rasta koi aur hai *
*ajab aitbaar-be-aitbaari ke daramiyan hai zindagi *
*mein qareeb hoon kisi aur ke mujhe jaanata koi aur hai *
*Wohi munsifon ki rivayatein wohi faisaloon ki ibaaratein *
*mera jurm to koi aur tha par meri sazaa koi aur hai *
*teri roshani meri Khadd-o-Khaal se mukhtalif to nahin magar *
*tu qareeb aa tujhe dekh loon tu wohi hai ya koi aur hai *
jo meri rayaazat-e-neem shab ko “Saleem” subah na mil saki
to phir iss ke m’ani to ye hue ke yahan Khudaa koi aur hai
(Saleem Kausar)
one of my favorites … 