~**~ Kia ishq nay samjha hay , Kia husan nay jaana hay ~**~

[GuL-e-Tasbeeh]

Re: ~~ Kia ishq nay samjha hay , Kia husan nay jaana hay ~~

@Khalil KhaaN FaaKhta

**Hukm kii ta’meel mere liye baa’is-e-sad-hazaar masarrat yeh rahii vo Ghazal:

**ik lafz-e-moHabbat ka adnaa saa fasaana hai
simte to dil-e-'aashiq, phaile to zamaana hai

yeh kiskaa tasavvur hai, yeh kiskaa fasaana hai
jo ashk hai aaNkhoN meN, tasbeeH kaa daana hai

hum 'ishq ke maaroN kaa itnaa he fasaana hai
rone ko nahiiN koii, haNsne ko zamaana hai

vo aur vafaa! dushman maneNge, na maanaa hai
sab dil ki sharaarat hai, aaNkhoN kaa bahaana hai

kiaa Husn ne samjhaa hai, kia 'ishq ne jaanaa hai
hum Khaak_nasheenoN kii Thokar meN zamaana hai

vo Husn-o-jamaal unkaa, yeh 'ishq-o-Shabaab apnaa
jeene kii tamannaa hai, marne kaa zamaana hai

yaa vo the Khafaa hum se, yaa hum the Khafaa un se
kal unkaa zamaana thaa aaj apnaa zamaana hai

ashkoN ke tabassum meN aahoN ke tarannum meN
ma’soom moHabbat kaa ma’soom fasaana hai

aaNkhoN meN namii sii hai, Chup-Chup se vo baiThe haiN
naazuk sii nigaahoN meN naazuk saa fasaana hai

hai 'ishq-e-junooN pesha, haaN! 'ishq-e-junooN pesha!
aaj ek sitamgar ko haNs haNs ke rulaana hai

yeh 'ishq nahiiN aasaaN, bas itnaa samajh liije
ik aag kaa daryaa hai aur Doob ke jaanaa hai

**wahh… bohat umdahh.. dono hazraat ka bohat shukriya..

salamat rahiye..**