Lal Masjid ke tanaazur meiN aek…Istida
**Ye kesa tarz-e-malaal hey **
ke kisi ki laoh-e-hisaab par
koi ashq nadaamat ka darj nahi!
**ye kesa tarz-e-imaan hey **
ke kisi bhi ahl-e-zubaan par
koi harf sadaaqat ka farz nahi!
ye kis jahaaN ke rivaaj heiN!
kahaaN ki heiN ye rivayateiN!
na kisi ke lab pe sawaal hey,
na kisi ke paas wazaahateiN!
meri bastiyoN ki fizaaoN meiN
ye rang surkh kiuN umad parra!
**na’jaaney kiuN mera aek haath, **
doos’rey sey ulajh parra! 
MeiN taar taar, lahu lahu
idhar girooN, udhar girooN
shab-e-be’basi ke shor meiN
**kisey sunooN, kisey kahooN **
ke jo kat gira na wo gheir tha
na jo bach gaya wohi gheir hey
na jo mit gaya wohi shar tha
na jo paa liya wohi kheir hey!
Barri mukhtasar si hey istida
ye mohabbatoN ki sar’zameeN
isey zulm-qada na banaiye
ye aashiyaaN jo sabhi ka hey
isey zindagi sey sajaaiye!
By: Amal
