**Aey reyg’zaar-e-hasti,
be’aas-o-be’basi ka tu dasht-e-be’kinaara
tu agar bura na maaney, tujhey ho agar gawaara
meri aarzu ki laasheiN, merey hosloN ki qabreiN
meiN kahaN pe ja ke dhooNdooN, mujhey kuch to dey ishaara!
Aey reyg’zaar-e-hasti,
teri dastaras meiN jo bhi rastoN ko apney bhooley
tu rakht-e-safar ko lootey, simtoN sey unki kheiley
ik khaak be-zarrar hey aadam ki keemya meiN
teri mashq-e-kusht-o-khooN ko kab tak bhala ye jheley!
Aey reyg’zaar-e-hasti,
ye fishaar-e-bad’tameezi, ye khumaar be-ta’haasha
tu ney apni wussatoN ko kya isi leeye taraasha!
terey roz-o-shab ke qissey detey heiN ye khulaasa
har shab naey shagoofey, har din naya tamaasha**