Mai'n Kaar-Aamad Hu'n Yaa Beykaar Hu'n Mai'n
Magar Aey Yaar ! Tera Yaar Hu'n Mai'n

Jo Dekha Hey Kisi Ko Mat B'taana
Ilaaqey Bhar Mei'n Izzat-Daar Hu'n Mai'n

Khud Apni Zaat Key Sarmaaey Mei'n Bhi
Sifar Feesad Ka Hissey Daar Hu'n Mai'n

Aur Ab Kyu'n Bain Kartey Aa Gaey Ho ?
Kaha Tha Na Bohot Beemaar Hu'n Mai'n

Mri To Saari Duniya Bas Tumhi Ho
Ghalat Kya Hey Jo Duniyaa-Daar Hu'n Mai'n

Kahaani Mei'n Jo Hota Hi Nahi'n Hey
Kahaani Ka Wohi Kirdaar Hu'n Mai'n

Yeh Tay Karta Hey Dastak Deney Waala
Kaha'n Dar Hu'n, Kaha'n Deevaar Hu'n Mai'n

Koi Samjhaaey Merey Dushmano'n Ko
Zara Si Dosti Ki Maar Hu'n Mai'n

Mujhey Patthar Samajh Ker Pesh Mat Aa
Zara Sa Rehm Ker, Jaa'n-Daar Hu'n Mai'n

Bas Itna Soch Ker Keejey Koi Hukm
Bara Munh-Zor Khidmat-Gaar Hu'n Mai'n

Koi Shak Hey To Bey-Shak Aazmaa Ley
Traa Honey Ka Daawey-Daar Hu'n Mai'n !

Agar Her Haal Mei'n Khush Rehna Fan Hey
To Phir Sab Sey Bara Fankaar Hu'n Mai'n

Zmaana To Mujhey Kehta Hey Faris
Magar Faris Ka Parda-Daar Hu'n Mai'n

Unhei'n Khilna Sikhaata Hu'n Mai'n Faris
Gulaabo'n Ka Sahoolat-Kaar Hu'n Mai'n